Häzirki wagtda dowam edýän milli parlamentiň deputatlarynyň, ýerli häkimiýet we öz-özüňi dolandyryş edaralarynyň agzalarynyň saýlawlary üçin saýlaw uçastoklarynyň ýanynda raýatlarymyza söwda we beýleki hyzmatlary hödürleýän göçme nokatlaryň 270-e golaýy göwnejaý iş alyp barýar diýip, «Türkmenistan» gazetiniň elektron neşiri ýazýar.
Bellenişi ýaly, Türkmenistanyň Söwda we daşary ykdysady aragatnaşyklar ministrligine degişli kärhanalar tarapyndan paýtagtymyzdaky we welaýatlardaky saýlaw uçastoklarynyň ýanynda açylan söwda nokatlarynda halkara synçylara hem-de saýlawlara gelýän saýlawçylara dürli-dümen tagamlar, şirin miwelerdir şireler, beýleki önümler hödürlenýär. Şeýlelikde, bu möhüm jemgyýetçilik-syýasy çäräniň geçişine syn etmäge gelen daşary ýurtly myhmanlar türkmen saçagynyň berekedi bilen tanşyp, halkymyzyň myhmansöýerlik däplerine ýakyndan şaýat bolýarlar.
